KAYLAN
by:chito balba
Tuwing maiisip,kahapong nagdaan,
Ang lahat ng pasakit,na aming naranasan,
Hindi maiwasang,malungkot malumbay,
Pagpatak ng luha,hindi mapigilan.
Pito kaming magkakapatid,ako ang pangalawa,
Lumaki sa hirap,ang aming pamilya,
Salat man sa yaman,kami ay masaya,
Basta sama-sama,kami sa tuwina.
Ngunit may pagsubok,dumating sa’mimg buhay,
Pagsubok na nagpabago,ng aming kapalaran,
Sa tindi ng lungkot,aming naranasan,
Pagsubok na dumating,hindi makayanan.
Ang mahal naming ina,sa mundo ay pumanaw,
Kaming mga anak niya,maagang naiwan,
Paano ang bukas,saming daratal?
Paano ba ang mabuhay,ng wala si nanay.?
Ginawa kong lahat,aking makakaya,
Upang matulungan,mahal na pamilya,
Di ikinakahiyang,ako’y naglabada,
Nang may dagdag baon,doon sa esk’wela.
Di ko sinasabing,pabaya si itay,
Pagkat aking batid,hirap n’yang pinasan,
Nais kong kahit pano,siya’y matulungan,
Kaya ginawa ko,ang makakayanan.
Alang-alang sa pamilya,ako ay nagpasya,
Upang makatulong,sa ibang baya’y nagpunta,
Ngayon ay narito,sa bansang Korea,
Nagtitiis sa hirap,kapiling luha’t dusa.
Kahit nangulila,sa pamilyang mahal,
Kinayang mapalayo,upang sila’y bigyan,
Tangi kong hangad,sila’y maalayan,
Magandang bukas,saganang pamumuhay.
Sa tulong at awa,ng Poong Maykapal,
Unti-unting naabot,pangarap na asam,
Mahal na pamilya,aking natulungan,
Nasuportahan sila,sa pangangailangan.
Akala ko noon,alala’y natapos,
Pagkat kami ngayon,di naghihikahos,
Ngunit sa pagdating,ng isang pagsubok,
Bakit ba pasakit,ay hindi maubos?
Kami ay masaya na,sa aming pamumuhay,
Unti-unting natanggap,wala na si inay,
Ngunit aming ama,kami ay sinaktan,
Nang mag uwi ng babaeng,kanyang ibinahay.
Kami ay nagulat,at sadyang nabigla,
Hindi napigilan,ang muling pagluha,
Sa aking trabaho,tuwina’y tulala.
Bakit nga ba itay,ito ay nagawa?
Hindi pa ba sapat,kami para sa’yo?
Pag-ibig kay inay,tunay bang naglaho?
Ngunit anong magagawa,kahit di namin gusto?
Sino kami na pipigil,sa kaligayahan mo?
Minsan gusto ko nang,tanungin ang langit,
Bakit kadalasan,tadhana’y kaylupit?
Kaylan matatapos,ang mga pasakit?
Kaylan magniningning,ang aming paligid?
